recent
اخر الأخبار

نصائح الجولة العاشرة من الفانتازى وتحليل متكامل لمباريات الجولة - Fantasy Expectations of The tenth Gameweek

نصائح الجولة العاشرة  من الفانتازى وتحليل متكامل لمباريات الجولة - Fantasy Expectations of The tenth  Gameweek

 


نصائح الجولة العاشرة  من الفانتازى وتحليل متكامل لمباريات الجولة

اهلا بكل زائرى موقع ايجى ستار 2020 اليوم سنقدم لكم تحليل متكامل عن مباريات الجولة العاشرة من الدورى الانجليزى

لكى تتمكن عزيزى القارئ من اختيار افضل اللاعبين المتوقع تألقهم فى الجولة العاشرة مقارنة بسهولة او صعوبة الخصم 

لكل لاعب ...


1️⃣كريستال بالاس & نيوكاسل 


 مباريات نيوكاسل  القادمة ( كريستال بالاس - استون فيلا - ويست بروميتش - ليدز ، فولهام )

 مباريات كريستال القادمة ( نيوكاسل -  ويست بروميتش- توتنهام - ويستهام - ليفربول )

 نيوكاسل سجل 10 اهداف ، واستقبل 15 هدف وكلين شيت وحيد 

 كريستال بالاس سجل 12 هدف واستقبل 13 هدف منهم 4 بس دخلوا ع ارضهم  وكلين شيت وحيد

✅ مدرب نيوكاسل اعلن ان ويلسون جاهز بينما اكد مدرب كريستال ان زاها اوت 

 ماتش هيبقي مقفول كروياً وبغياب زاها الاختيارات هتبقى محدودة ونركز على الدفاعات . 

✅ ميتشيل محدش عارف هيلعب ام لا بس لو عندك ابدأ فكر فى بيعه خلاص اصبح اقرب للدكة بنسبة كبيرة .

 فان هولت سعره وصل 5.4 غالي بس ثمنه فيه لاعب باك برتبه جناح وكمان بليعب ضربات جزاء ومفترض نشوف منه

مساهامات هجومية فى الاسبوع العاشر و ال 11 لان بعد كده مبارياته هتصعب جدا عنده من بعد كده ليفر توتنهام ويستهام بس لو

مش عندك وعاوز بنفس السعر لاعب افضل على المدى البعيد ارشحلك :

( بيلرين ارسنال - زوما & تشيلويل تشيلسى - كاستاني ليستر ) 

بس لو مخطط على المدى القريب يبقى اشترية لانه في ظل غياب زاها ومليجوفيتش هو المنفذ الاول لضربات الجزاء زى ما وضحنا 

 نيوكاسل هجوميا فريق عادى ودفاعيا ليسوا بالفريق لكن ضع فى الاعتبار ان خصمهم ليس بالفريق القوى ايضاً هجومياً

خصوصا ف احتماليه غياب زاها فممكن جدا تلاقيهم طالعين كلين والماتش يخلص تعادل سلبى او ان فريق فيهم يخطف هدف يتيم 

✅ ماتشات نيوكاسل الجايه حلوه الي حد ما تقدر تجيب مدافع منهم زي لويس ب 4.3 وممكن تلاقيهم بيطلعوا كلين ماتشات كتير

 هجوميا نيوكاسل مفهاش غير ويلسون لو لعب ولو عندك سيبه ماتشاته حلوه وهو الوحيد ال ممكن يعمل حاجه 

كريستال اقرب للفوز ووارد جدا يطلعوا كلين شيت ونسبتهم 36% ونسبة كلين نيوكاسل 27 %

اهم اللاعبين :


 ✅ كريستال : فان هوليت

✅ نيوكاسل : ويسلون 



2️⃣ برايتون & ليفربول :


 برايتون سجل 13 هدف واستقبل 15 هدف 

 ليفربول سجل 21 هدف واستقبل 16 هدف

 مباريات الليفر القادمة ( برايتون - الولفر - فولهام - توتنهام - كريستال ) 

✅ مباريات برايتون القادمة ( ليفربول - الثاوث - ليستر - فولهام - شيفيلد )

✅ اقدر اقول خلاص نقدر نعتمد على ثنائية من ليفربول لمباريات الجولات القادمه واقصد بالثنائية (جوتا و صلاح او جوتا ومانى )

ودا لسبب ان مباريات الليفر القادمة حلوه جدا و جوتا شكله كدا مكمل معانا اساسي واول من فكر كلوب ف اراحته فى الابطال -

اللاعب ريح ونزل تلت ساعه بس وسعر اللاعب مغرى مقارنه بمركزه فى الملعب وتقدمه المستمر .

 صلاح شارك فى الابطال  60 دقيقه ولسه بعيد بدنياً ودا طبيعى بعد الكورنا فى اول مشاركة ، جوتا شارك 30 دقيقه -

ماني لعب المباراه بالكامل - فيرمينو شارك 30 دقيقه

 ليفربول دفاعيا لا ارشح احد ولو مصمم تجيب منهم لاعب يبقي روبرنسون الوحيد ال فايق

وقولنا اول الموسم ان روبرتسون هيعمل موسم احسن من ارنولد لكن سعره عالى وفى خيارات افضل على المدى البعيد

زى تشيلويل وبسعر اقل . 

 لامبتي ي جماعه هيغيب جوله واحده بس . الواد مش مستاهل تبيعه . هتخسر فيه ومردود الهجومي رائع .

ووارد جداً انك كنت تجعله دكة ضد الليفر فاعتبر نفسك عملت كده وبلاش تبيعه .

ومن وجهه نظرى ان غياب لامبتى عن الليفر مصلحة كبيرة لبرايتون لان بديله افضل منه دفاعيا ودا مطلوب قدام خصم زى الليفر 

 برايتون بيلعب لعب مفتوح وكويسين هجوميا والافضل عندهم لامبتي الغائب و ممكن موباي دا لو يركز فى الملعب 
 
 كلين شيت لو حد طلع كلين هيكون الليفر وطبعا مقدرش اضمن كلين الليفر

ضاع كلينهم قدام ويستهام وطلعوا كلين بعدها قدام ليستر ودا توقع غريب جدا 

نسبة كلين ليفربول 37 % ونسبة كلين برايتون 16 % .


 اهم اللاعبين :


✅ ليفربول :  صلاح - جوتا - روبرنسون - ماني .

✅ برايتون : لا احد .




3️⃣السيتى & بيرنلى 


 الستي سجل 10 ، واستقبل 11 

 بيرنلي سجل 4 اهداف واستقبل 12

 مباريات الستي القادمة ( بيرنلى - فولهام - اليونايتيد - ويست بروميتش - الساوث )

 مباريات بيرنلي القادمة ( الستي - ايفرتون - ارسنال - الفيلا - الولفر )

 من اسهل الجداول ف البريميرليج الفترة اللى جايه جدول الستي - استغلوا دا لو متاح ليكم .

 بوب صعب يشارك لانه اتصاب ف راسه وطبعا الحارس دا غيابه هيسهل جدا مهمه السيتى الهجومية

رغم ان بيرنلى كان بدأ يرجع دفاعيا فى اخر مبارتان .
 
 دي بروين ريح الابطال كامل مسافرش اصلا . سترلينج رجع وشارك 70 دقيقه بس . توريس مشاركش فى الابطال وريح

 السيتى فرقه تقيله وهتبدأ تظهر فى المبايات القادمة فلازم يكون عندك دي بروين او سترلينج الماتشات الجايه دي

 او حتى توريس لو تقدر .

 اجويرو رجع وشارك ربع ساعه فى الابطال ودا اهم مهاجم فى الدورى الانجليزى ككل لو عاد لمستواه وبعدت عنه الاصابات

الفترة اللى جاية وممكن نحط عنينا عليه خلاص بمجرد ما يبدأ اول مباراه اساسى .

 فى ظل سهوله الماتشات دي هنفكر ف مدافع . هيبقي قدامنا كانسلو او دياز . اكتر اتنين شاركوا

وكمان كانسيلو بيتقدم كتير وممكن تاخد منه اسيست ف وسط الماتشات دي والاهم منهم لانه ثابت فى الدفاع هو ووكر 

 برجوع بين مي . شوفنا مستواهم الدفاعي ظبط والماتش ال فات طلعوا كلين ثانى

 بس بغياب بوب الوضع هيبقى اسوأ مره ثانيه

 بيرنلي هجوميا معدومه بمعني الكلمه ومرشحش حد منهم خالص هجومياً 

السيتى وارد جدا يعمل كلين شيت ونسبة حصول دا المتوقعه 55 % وصعب جدا بيرنلى يعمل كلين ونسبة حصولهم على كلين 9 %



اهم اللاعبين :


 السيتى : ( دي بروين ، سترلينج ، توريس ، اجويرو )

✅ بيرنلى : لا احد 



4️⃣ ايفرتون & ليدز 


 ليدز سجل 14 هدف واستقبل 17 هدف .

 ايفرتون سجل 19 هدف واستقبل 16 . 

 مباريات ايفرتون القادمة (  ليدز - بيرنلي - تشيلسي - ليستر - ارسنال )

 مباريات ليدز القادمة ( ايفرتون - تشيلسي - ويستهام - نيوكاسل ) 

 ايفرتون السنه دى فريق هجومى بحت وبيقدم كرة هجومية ممتعه متنوعة فلو عندك اى لاعب هجومى منهم

يلعب اى مباراه اساسى حتى لو كان الخصم تشيلسي وليستر وارسنال .

 كلفرت لوين المهاجم الاول هذا الموسم بالارقام ولو معندكش لحد دلوقتى تبقى مشكلة كبيرة ليك لانه لاعب متحكم فى الافريج

لوين مكمل تسجيل وهينافس على الهداف السنه دى فلو مش عندك فعلا انت بتضيع نفسك بالبطيىْ .

 ايفرتون برجوع رودريجز وريتشا مستواهم رجع هجوميا وليدز بيلعب مباريات وكره مفتوحه ففرصه تسجيل ايفرتون كبيرة

  دين اتصاب ممكن يغيب شهرين بس ننتظر الرسمى والتأكيد 

ولو اتأكد يكون عينك على نيكونكو دا لاعب ب ٤ مليوووون بس وشارك ف توقف لوكاس دين لما كان مطرود .

 لو عندك رودريجز فدا لاعب متبعوش وهيديك نقاط كويسه الكام جولة اللى جايين .

✅ ريتشا كويس جدا عايز تجيبه وتعتمد عليه هاته طبعاً وهو ثانى افضل خيار هجومى فى ايفرتون بعد المعلم لوين طبعاً

ومن الاخر سواء كلفرت وجيمس او كلفرت وريتشا لو عندك الدبل دا سيبه الماتشين الجايين دولعلى الاقل .

 بامفورد بس اللى تجيبه من ليدز ولو مصمم على لاعب مدافع منهم يبقى دالاس مش عشان كلين لكن بيتقدم وبتلاقيه

فى صندوق الخصم وبيسدد اون جول .

 ليدز هجوميا ممتازه ايا كان بتقابل مين اداءهم ولعبهم في اي وقت ممكن يسجلوا ف اي فريق ايا كان

عادي يخسروا 3 و 4 لكن تلاقيهم عاملين فوق ال 14 فرصه ومسجلين هدف واثنين وثلاثه . 

 بامفورد لو سجل كل الكور ال جاتله كان زمانه هداف الدوري . الواد بيتحرك حلو ف الملعب . بس معندوش حظ خالص .

كميه كور سهله وكور ف العارضه منه رهيبه . لو  عندك سيبه واستمر بيه . مستواه حلو ولو فتحت معاه هتفتح .

 بالفرقتين واقعين دفاعياً وبلاش حد من دفاعهم 

 كلين شيت الفرقتين صعب لكن نسبة كلين ايفرتون 30 % وليدز 19 % .


اهم اللاعبين :


✅ ايفرتون : ( لوين - رودريجز - ريتشالسون )

✅ ليدز : ( بامفورد )


5️⃣ويست بروميتش & شيفيلد


اى كلام عليه تضييع وقت بصراحه لانها مباراه ميت بيلاعب ميت 

اى لاعب عند من الفرقتين طير خااااالص 

✅ نسبة كلين ويست بروميش 33 % ونسبة كلين شيفيلد 31 %


اهم اللاعبين :


✅ لا احد من اى فريق فيهم 




6️⃣ الثاوث & المان يونايتد


  اليونايتيد سجل ١٣ واستقبل ١٤ .

 الساوث سجل ١٧ واستقبل ١٣ .

 مباريات اليونايتد القادمة (  ساوث - ويستهام - ستي - شيفيلد - ليدز ) .

 مباريات الساوث القادمة ( مان يونايتد - برايتون - شيفيلد - ارسنال - الستي )

 لاول مره اشوف خطه لليونايتيد متكامله كانت اول امس فى الابطال ( كافاني . راشفورد . مارسيال . برونو .دي بيك )

احسن خطه فعلا نشوفها لليونايتيد الموسم دا حتى الان كشكل هجومى .

 برونو وراشفورد شاركوا ف الابطال ٥٩ دقيقه بس والاتنين جاهزين للمباراه وطبعا خيار اول هجوميا لسولشاير المشجع 

 الساوث مش القوه الدفاعيه ال تخاف منها قدام الفرق الكبيره بس اعتقد مدربهم اتعلم من مباراه توتنهام ومش هيفتح الملعب 

قدام اى فريق كبير قادم 

 راشفورد مسيره هيسجل وقريب اوى فبلاش تبيع راشفورد لو عندك لان مباريات اليونايتيد الجايه حلوه جدا 

وراشفورد بطبعه هجومى شرس 

✅ برونو المعلم ابن المعلم يتحط اول لاعب فى ال 11 اللى عندك الاساسيين بعد كده تحط باقى فريقك ودا مختصر الكلام .


 تيليس لعيب كبير وباك قادم بقوه برتبه جناح بيتقدم جدا ويستاهل انك تجيبه وتبقي مختلف بيه 

هتلاقيه ف اوقات جاب نقط كويسه وقريب اوى ومعاه الكرونر 

✅ بيساكا خرج في د ٥٩ فى الابطال وصرح سولشاير ان عنده اصابة بسيطة وفي انتظار المؤتمر 

بس غالبا الاصابة بسيطة وهيكون جاهز  

✅ متوقعش كلين شيت فى المباراه دى لاى فريق لكن نسبة كلين المان 34 % ونسبة كلين الثاوث 22 %



اهم اللاعبين :



 اليونايتيد : ( برونو - راشفورد - تيليس ) وبلاش دبل منهم الا لو دفاع مع برونو او راشفورد

 الثاوث : ( ادامز والكوت والكر بيترز او مكارثي ) .




7️⃣ تشيلسى & توتنهام 


 تشيلسي سجل ٢٢ واستقبل ١٠

 توتنهام سجل ٢١ واستقبل ٩ 

هجوم جبار من الفرقتين 

 الفرقتين دول من اكتر الفرق القويه هجوميا ف الدوري كله وبداو ينظموا نفسهم جدا جدا  دفاعيا وهجوميا

 ماتش هيبقي صعب اووووي عليهم . فرقتين بمستواهم دا احسن من كل فرق الدوري اداء حتى الان

 مباريات تشيلسي القادمة ( توتنهام - ليدز - ايفرتون - الولفر - ويستهام )

 مباريات توتنهام القادمة ( تشيلسي - ارسنال - بالاس - ليفربول - ليستر ستي ) 

 نبدا بالبلوز : 

- المدرب اعلن ان بوليستش جاهز ودا معناه ان الاحتمال الاوليكون اللاعب دكة 

وقتها الخطه هتكون ابراهام . زياش . فيرنر . هافريتز . ماونت او كانتي

الاحتمال الثاني يبدا اساسى وهنا الحيرة الكبيرة هيبقي معانا زياش . بوليستش . هافريتز . 

فيرنر وابرهام الماتش دا مين هيلعب مهاجم فيهم 😀

اتوقع مجرد توقع ان لو بوليستش لعب اساسي هيكون فى راحه لفرينير المرهق جدا وخصوصا كمان ان ابراهام خرج فى الابطال 

اخر ربع ساعه وفيرنير كمل لنهاية اللقاء 

 طبعا دفاعيا البلوز بيتحسن جدا كل مباراه عندك تشيلويل ولو عاوز لاعب سعره اقل هات زوما . 

وال عنده دبل من البلوز دفاعي . قعد واحد ولعب التاني . طبعا ال هتلعبه تشيلويل . طب لو معندكش تشيلويل . وعندك زوما وميندي 

لاعب ميندى افضل .

 توتنهام سون وكين هما توتنهام فانتازياً 

 موضوع الدبل بوجودهم الاثنين افضل يكون لاعب واحد فيهم وهو سون بس لو عندك الاثنين ومصمم مفيش مشكله 

ويلعبوا الاثنين  .

 تشيلسي اضمن واحد ضامن مكانه زياش .

✅ اعتقد مفيش كلين شيت لاى فريق فيهم فى المباراه دى وان كان تشيلسى الاقرب بنسبة 31 % وتوتنهام 21 %


اهم اللاعبين :



  تشيلسي : ( زياش وابراهام وتشيلويل  لان حاسس الماتش دا حد يريح زي فيرنر او بوليستش )

✅ توتنهام : (سون - كين )




8️⃣ ارسنال & الولفز 


 ارسنال سجل ٩ واستقبل ١٠

 الولفر سجل ٩ واستقبل ١٠

فرقتين مميزين دفاعيا اكتر من هجومهم ومازال كلا الفرقتين يبحثوا عن نفسهم هجوميا حتى الان .

 مباريات ارسنال القادمة ( الولفز - توتنهام - بيرنلي - الساوث - ايفرتون)

✅ مباريات الولفر القادمة (  ارسنال - الليفر - استون - تشيلسي - بيرنلي )

 ارسنال سيئه جدا هجوميا  ابعد عن لعبتهم - الفريق مفيش لاعب يقدر يجبلك نقط وتجيبه .

 وسط وهجوم سيئين واوبا تحسه مشتت ومفيش ال يلعبه ويوصله هجوميا وسعره عالى بالنظر لمستةاه الحالى 11.7

 بيرلين بس ال ممكن تجيبه منهم ولينو الحارس لان دفاعهم هو الافضل

 مبرشحش حد من دفاع الولفر الفتره الجايه . ماتشاتهم السهله خلصت 

 لو عندك كيلمان سيبه اهو تقعده دكه مش هتخسر فيه

 خمينيز ممكن يسجل ف اي وقت وكل جوله اسيست او جون فلو عندك وعايز تستمر بيه عادي بس دا مهاجم الهدف الواحد .

✅ كلين شيت الفرقتين وارد ووراد كمان يسجلوا فى بعض بس ارسنال الاقرب للكلين

نسبة الكلين لارسنال 39 % و للوفز 26 %


اهم اللاعبين :


✅ ارسنال ( بيرلين )

✅ الولفز ( خيمينز )



9️⃣  ليستر & فولهام 


 ليستر سجلت 18 واستقبلت 12

✅ فولهام سجلت 9 واستبقلت 18

 مباريات ليستر القادمة ( فولهام - شيفيلد - برايتون - ايفرتون )

 فاردي الماتشات دي ممكن تجيبه . وممكن تكبتنه ماتش فولهام دا . لمحبي فاردي

 طبقا للجولات ال فاتت فولهام فريق تعبان واي حد يتكبتن قصاده بيجيب نقط 

 كاستانجا مش هيشارك ف الاوروبي انهارده ولسه المدرب هيقيم حالته فبلاش تجيبه من دلوقتي الا لو عندك

 ماتشات ليستر حلوه وتقدر تعتمد ع دفاعهم وهجومهم . 

 عندك جاستن سيبه ولعبه . المدرب صرح ان بيريرا قدامه اسبوعين عشان يكون جاهز .

 كلين شيت لو لحد هيكون ليستر

 هارفي بارنس خيار حلو ف الماتشات السهله دي

✅ نسبة الكلين كبيرة جدا لليستر وصعبه جدا لفولهام 

متوقع نسبة كلين ليستر 42 % ولفولهام 16 % 


اهم اللاعبين :


 ليستر : ( فاردي بارنس جاستن)

 فولهام : لا احد




🔟 ويستهام & الفيلا 


 ويستهام سجل ١٥ واستقبل ١٠

 فيلا سجلت ١٩ واستقبل ١١

 مباريات ويستهام القادمة ( الفيلا - يونايتيد - ليدز - كريستال - تسيلسي ) . 

 مباريات الفيلا القادمة ( ويستهام - نيوكاسل - ولفر - بيرنلي - بروميتش ) .

 الفرقتين دفاعيا منظمين جدا . 

✅ الفرقتين وارد جدا يسجلوا فى بعض وان كان ويستهام اقرب بقليل للمكسب 

✅ نسبة كلين ويستهام 27 % والفيلا 23 % .


اهم اللاعبين :


✅ ويستهام : ( بوين - انطونيو - كريسويل )

✅ الفيلا : ( جيريليش - واتنكس )




افضل خيارات الكبتنة الامنة :

1 - فاردى

2 - لوين

3 - برونو



افضل خيارات الكبتنة الديفرينشال :

1 - صلاح

2 - دى بروين



افضل خيارات الكبتنة الريسك:

1 - بامفورد


شكراً لكم .. والى لقاء قريب ان شاء الله

📝 ميزو ارسنالى 






google-playkhamsatmostaqltradent