نصائح الجولة الثامنة من الفانتازى وتحليل متكامل لمباريات الجولة الثامنة - Fantasy Expectations of The eighth G W

نصائح الجولة الثامنة من الفانتازى وتحليل متكامل لمباريات الجولة الثامنة  - Fantasy Expectations of The eighth G W


نصائح الجولة الثامنة من الفانتازى وتحليل متكامل لمباريات الجولة الثامنة

اهلا بكل زائرى موقع ايجى ستار 2020 اليوم سنقدم لكم تحليل متكامل عن مباريات الجولة الثامنة من الدورى الانجليزى

لكى تتمكن عزيزى القارئ من اختيار افضل اللاعبين المتوقع تألقهم فى الجولة الثامنة  مقارنة بسهولة او صعوبة الخصم 

لكل لاعب ...

1️⃣  برايتون & بيرنلى


✅ برايتون سجل ١١ هدف . استقبل ١٤ . طلع كلين شيت وحيد 

برايتون سجلو اهداف في كل المباريات السبعة اللي لعبوها يعنى كلين بيرنلي صعب

✅بيرنلي سجلت ٣ واستقبلت ١٢ وطلعت كلين وحيد وبتقدم موسم سيىء جدا عكس المتوقع

✅ ماتشات برايتون الجايه بعد بيرنلي . استون فيلا . ليفربول . الساوث . ليستر ستي . ماتشات مش حلوه .

وبرايتون دفاعيا مش قويه ولو عندك دفاع منها او رايان حاول تخلص منهم مش هيطلعوا كلين وسهل اي فريق يسجل فيهم

✅ بيرنلي عندهم البالاس . ستي . ايفرتون . ارسنال . ماتشاتهم تقيله اوووي وهما اصلا زفت دفاعيا . وهجوميا سجلوا ٣ اهداف .

✅ نقول باى باى لكل لعيبه بيرنلي من عندك دفاع هجوم حارس

✅ ممكن تسيب لامبتي الجوله دي وتحاول تشوف بديل الجولات الجايه لو عايز تستمر بيه مش وحش

لكن لو مش عندك متروحش تجيبه ماتشاته مش حلوه ومش عشان جاب جون تجري تجيبه 

✅ رايان لو عندك اخلص منه

✅ موباي المدرب قال انه جاهز وكان مجرد بيشده عشان غروره . فلو عندك هتقعد تقول هيلعب ولا وبنسبة كبيرة هيبدأ اساسى .

موباي حاليا ف خيارات احسن منه بكتير . مش لازم تتمسك بيه اوي كدا ممكن تطيره او تسيبه الجوله دي لو عندك لكن متجريش

تشتريه خلاص كدا لحد ما نشوف قصته هتننتهى على ايه مع مدربه .

✅ تروسارد لو عندك لحد دلوقتي هو حلو وكل حاجه بس برضوا شوفله بديل وبالاخص ان في ويستهام ماتشاتهم اتحسنت تقدر

تبدل تروسارد ب بوين او فورناس دا . 

✅ كلين شيت فرقتين تعبانين هيبقي ماتش مقفل وممكن يضيعوا كلين بعض . عندك لامبتي لعبه متقعدوش دكه الماتش دا

✅ مبرشحش حد ف الفرقتين . الا لو دفاع بس لعبه يمكن يخطف كلين وموباي لو عندك لعبه برضوا


2️⃣ ثاوثهمبتون & نيوكاسل

✅ الساوث سجل ١٤ هدف . الفريق حلو هجوميا جدا . استقبل ١٢ هدف . وطلع ٣ كلين شيت 

✅ نيوكاسل سجل ١٠ واستقبل ١١ وطلع كلين وحيد اول ماتش بس

✅ ماتشات الساوث الجايه ولفر. يونايتيد . برايتون . شيفيلد

✅ ماتشات نيوكاسل الجايه . تشيلسي . بالاس . فيلا . بروميتش

✅ لو بصينا ماتشات نيوكاسل حلوه فعلا تقدر حاليا تبدا تفكر ف مدافع منهم جمال لويس او لاساليس . الفريق دفاعيا متماسك

وهنبدا نشوف كلين ليهم . وماتشاتهم الجايه حلوه بعد تشيلسي . قدام فرق هجوميا ضعيفه . فكر ف دفاعهم . جمال لويس رخص

وبقا ب ٤.٣ فكر فيه ماتشاتهم الجايه حلوه

✅ ويلسون برضوا خيار حلو جدا . اي نعم الفريق مش اد كدا هجوميا . بس ضربه جزاء . بيخطف جون . هيجبلك نقط مش وحشه

بالنسبة لسعره. 

✅ الساوث بعد اصابه انجز منعرفش شكلهم الهجومي هيبقي عامل ازاي . ممكن تفكر ف ادامز بس مش هتخسر حاجه الواد حلو

وسعره حلو وبيحاول وخيار ممتاز 

✅ دفاعيا الساوث الفتره الجايه مبرشحوش دفاعيا سواء مكارثي او دفاعه . ماتشاتهم قدام فرق هتعرف تسجل  

✅ الفرقتين حاليا لو هتجيب حد يبقي ويلسون . جمال لويس . ادامز مكارثي غير كدا طير اي حد 

✅ الكلين شيت برضوا لو عندك مدافع من نيوكاسل لعبه . لو عندك مكارثي ومش عارف تبيعه لعبه الجوله دي ممكن عادي حد

يطلع كلين او يطيروا كلين بعض . الماتشات ال زي دي بتخلص ١ صفر او يطيروا الكلينات وغير متوقعة

توقعي الشخصي ان مفيش كلين والساوث فرصته اعلى في الكلين وفرصته اعلى في التسجيل


3️⃣ السيتى & الليفر

✅ الستي سجل ٩ اهداف . استقبل ٨ . طلع ٢ كلين . الستي ال كان بيسجل ٩ ف ماتش . مسجلهم ف ٦ ماتشات

✅ ماتشاتهم الجايه بعد الليفر. توتنهام . بيرنلي . فولهام . يونايتيد 

✅ رحيم لعب ٨٢ دقيقه ف الابطال . دي بروين لعب ٨٥ . لكن ماتشهم لسه يوم الاحد ومعاهم راحه كبيره عادي جدا

✅ خيسوس لعب ربع ساعه الماتش ال فات وسجل جون

✅ الماتشين ال بعد الليفر وتوتنهام حلوين اوي  

✅ عندك دي بروين او سترلينج سيبه ولعبه

✅ بلاش تجيب خيسوس لسه راجع وممكن تجيبه يتصاب وتلبسه زي ملبسنا اجويرو والكل جابه وال كبتنه 

✅ هيبقي ماتش تقيل ومقفول 

✅ الليفر سجل ١٧ واستقبل ١٥ وطلع كلين وحيد

✅ الفرقتين مستواهم زفت لكن ميزه الليفر الوحيده انه حتي وهو زفت بيعرف يكسب الماتش مبكلمش ع ماتشه مع الستي . 

✅ ماتشات الليفر الجايه . بعد الستي . ليستر . برايتون . ولفرهامثون . فولهام

✅ جوتا خيار كويس جدا . بس سؤال هتجيبه لوحده بدل صلاح وماني هقولك لا طبعا . صلاح او ماني احسن

✅ هتعمل دبل من الليفر . استني يعدوا الستي وليستر الاول . لكن كتير تعمل دبل اصلا وهما مستواهم مش التوب

فيران توريس بعد رجوع خيسوس اتوقع هيتراجع وممكن تلاقيه عالدكة

✅ بلاش جوتا دلوقتي وكفايا صلاح او ماني ولو مش عندك صلاح او مانى يبقى جوتا خيار ممتاز

✅ طير ارنولد وروبرتسون بقا كفايا كدا

✅ فكر ف كانسيلو بالاخص الماتشين السهلين اوووي ال بعد الستي وتوتنهام . بيهاجم وبيحاول ودايما ف البونص

✅ كلين شيت هيضيع 


4️⃣ايفرتون & مان يونايتد

✅ ايفرتون سجل ١٥ هدف استقبل ١١ وطلع كلين وحيد 

✅ ماتشاتهم الجايه فولهام . ليدز . بيرنلي . تشيلسي كويسه جدا جدا 

✅ اليونايتيد سجل ٩ واستقبل ١٣ وطلع كلين يتيم 

✅ ماتشات اليونايتيد الجايه بروميتش . ساوث . ويستهام . ستي 

✅ ايفرتون ف غياب ريتشا وجيمس رودريجز ولوكاس دين بصراحه مستواهم ضايع . 

 لكن اتوقع الماتش دا خميس هيرجع . بالاضافه ل لوكاس دين هيلعب لان ايقافه انتهي .

انما ريتشا لسه هيغيب لان مطرود ودا اخر ماتش هيغيبه .

اظن اداء ايفرتون هيتحسن تاني وهنبدا نشوف اجوان منهم وماتشاتهم الجايه جمييله بجد وممكن تفكر ف دفاعهم بعد الجوله دي
 
✅ كلفرت لوين مش للبيع . وبطل هزار الواد بيقدم كوره ممكن ف اي وقت يخطف جون وشوفت الماتش ال فات ايفرتون مقدمتش

كوره وبرغم من كدا سجل جون وخميس راجع وهنبدا نشوف صحوه وماتشاتهم الجايه تحفه

✅ اليونايتيد هينزل الماتش دا يهاجم وعارف انكم جبتوا اخركم من لعيبه اليونايتيد بس هقولك حاجه سيب لعبتهم ومتبعهمش

سواء برونو او راشفورد . هييجوا لو فاقوا هيفوزوا ٣ او ٤ ماتشات ورا بعض وهتاخد نقط حلوه بالاخص ماتشاتهم سهله

من بعد ايفرتون 

✅ اليونايتيد هتنزل مهاجمه ومش هتقفل واتوقع الماتش دا الفرقتين هيسجلوا وهيبقي ماتش مفتوح .

 وراشفورد وبرونو وكلفرت هيجيبوا نقط 

✅ برشح راشفورد وهكررها هات راشفورد وسيبه عندك الكام جوله الجايين

مارسيال ايقافه انتهى وهيرجع الجولة دي واللاعب جعان كورة وعاوز يثبت نفسه

وهو اضافة كبيرة لهجوم اليونايتد لما بيكون فورمة

عاوز لاعب ديفرنشيال مكان انجز ممكن تفكر في مارسيال ماتشاته الجاية حلوة وتوقعى الشخصي مارسيال راشفورد برونو المثلث

دة هيبقو نجوم الفترة الجاية بشرط ان سولشاير يبقى مدرب مش مشجع

✅ ابرز الخيارات راشفورد . برونو .مارسيال كلفرت لوين 

✅ بعد الماتش دا فكر ف دفاع ايفرتون هنبدا نشوف كلينات.

✅ دفاع اليونايتيد بلاش خليك ف لاعب واحد منهم . راشفورد او برونو لمحبي برونو

✅ مفيش كلين الماتش دا بنسبة كبيرة


5️⃣  كريستال بالاس & ليدز

✅ قبل مقول اي احصائيه هقول حاجه سريعه جدا . الماتش ال فات كان هيتحسب ضربه جزاء للبالاس والفار لغاها

وكان ال داخل يشوطها ميجلوفيتش . فاكرين الموسم ال فات اللاعب دا كان الناس جايباه عشان البلنتيات بس 

#نستفاد_ايه نستفاد ان زاها مكنش هيلعبها وان ميجلوفيتش ال كان هيشوطها وبعوده ميجلوفيتش .

#لكن_من_حظكم ان ميجلوفيتش انطرد الماتش ال فات وهيغيب ٣ ماتشات .

فلو ف بلنتي زاها هيلعبه بس اظن لما يرجع خلاص كدا زاها اوت من البلنتيات

في منافس قوي لزاها عالبلنتيات وهو فان انهولت السنة اللي فاتت كان رقم ٢ في ضربات الجزاء بعد مليجوفيتش حتى في وجود

زاها فوارد جدا يجي بلنتى ونلاقي انهولت اللي بيشوط مش زاها لسه هنشوف بس توقعي الشخصي زاها هداف الفريق وهيبقي

مستقبل ضربات الجزاء الموسم دة لكن لو ميجلوفيتش رجع هياخدها رسمي سنين وهو ال بيلعبها 

✅ البالاس سجل ٨ واستقبل ١١ و طلع كلين

✅ ماتشات البالاس الجايه بيرنلي . نيوكاسل . بروميتش . توتنهام

✅ فكر ف دفاع البالاس الفتره الجايه او حارسهم . البالاس قوي دفاعيا ويقدر يطلع كلين وماتشاته قدام فرق مش اد كدا هجوميا

✅ لو عندك ميتشيل سيبه وشوف هيقعد دكه ولا هيكمل يلعب عادي . واظن خيار حلو والماتشات كويسه وسعره .

مش مستاهل تبيعه . وماتشات البالاس اسهل من الولفر لل بيبدله ب كيلمان . فسيب ميتشيل لحد متشوفه مبيلعبش . 

✅ البالاس هجوميا مش اقويه واللي عنده زاها زي مقولت يستمر بيه ماتشين لكن يشوفله بديل انا شايف ان لو انسحب منه

البلنتيات . نقطه هتقل تدريجي وهيبقي بلانك كتير

✅ ليدز سجلت ١٣ هدف واستقبلت ١٣ وطلعوا ٢ كلين .

✅ ماتشات ليدز الجايه رخمه   ارسنال . ايفرتون . تشيلسي . ويستهام . ماتشات تقيله

✅ الناس ال بتجري تشتري دالاس . مش عشان سجل جون نجيبه . اذا كان ف الماتشات السهله مطلعش كلين . داخل ع مطحنه .

رايي طير كل دفاع ليدز . الفريق اي حد ممكن يسجل فيه

✅ ليدز هجوميا جبارين . تقولي بقا هيقابلو مباريات صعبة سواء ارسنال او ايفرتون . يقدروا يسجلوا  ف اي حد .

بامفورد اصلا ماتش ليستر ال فات مضيع ٣ اهداف محققه 

✅ لو عندك بامفورد وعايز تستمر بيه استمر . بامفورد مهاجم تقيل ومش معني ماتشاته صعبه انه مش هيسجل .

عادي وقت هتلاقيه بلانك ووقت هيسجل حتي لو فريق صعب 

✅ برشح من ليدز بامفورد بس

✅ البالاس مدافع لقدام مش لماتش واحد وماتشاتهم حلوه . ولو عندك زاها كمل بيه الجولتين دول

✅ كلين شيت والله الكلينين مش مضمونين وعادي برضوا تلاقي محاولات من الفرقتين وواحده تخطف جون .

 ومتصدمش لو لقيت البالاس طالعه كلين . ليدز تهاجم وهجومها ناري بس سوء توفيق ممكن ميسجلوش خالص 

✅ لعب بامفورد بس لو عندك ولو مزنوق ف مدافع وعندك ميتشيل لعبه . لو لسه مصاب مش هينزل وهينزلك الدكه


6️⃣ تشيلسى & شيفيلد

✅ تشيلسي سجلت ١٦ جول . واستقبلوا ٩ قبل مييجي ميندي . وطلعوا ٣ كلين لما جه ميندي 😃

✅ شيفيلد فريق بارد ولازم يهبطوا مسجلين ٣ وداخل فيهم ١٠ وصفر كلين

✅ ماتشات البلوز الجايه . نيوكاسل توتنهام . ليدز . ايفرتون

✅ جورجينو لو عندك طيره اتسحب منه البلنتيات وكمان لامبارد بيجرب ماونت ف مكانه يعن ممكن تلاقي الابن المدلل ل لامبارد 

ماونت واخد مكانه وجورجينو اوت

✅ فيرنر بقا المنفذ الاول للبلنتيات .

من اقوي المهاجمين ف الدوري . بس للاسف ما زال بيحطه جناح بعد اصابه بوليستش تاني . بس فيرنر عايز صبر . عندك او 

هتجيبه انساه بقا وهتاخد منه نقط حلوه مع الوقت

✅ تشيلويل ابراهام لعبوا ٦٣ دقيقه بس . فيرنر لعب الماتش كله . زياش طلع ف الدقيقه ٧٣ دا ف ماتش الابطال ال فات 

✅ بوليستش مفيش اخبار بس اتوقع هيكون دكه او برا الماتش وهيرجع بعد التوقف الدولي

✅ هافريتز كورونا مش هيشارك بكرا وهيرجع بعد التوقف الدولي

✅ زياش خيار ممتاز ف غياب كل دا اكيد هيلعب اساسي وبيهاجم وبيسدد كتير عالجون وخطير جدا عالجون وننصح بيه الفترة 

الجاية بديل لهافيرتز

✅ عادي تعمل دبل من دفاع تشيلسي ع فكره . ميندي وزوما . ميندي وتشيلويل . زوما وتشيلويل .وعفكره الحارس قوي جدا 

وممكن بالاضافه للكلين . جون زوما او اسيستات من تشيلويل . يعن ممكن يروقوا عليك ف ماتش ب ١٥ او ٢٠ نقطه 

مع بعض طبعا 

✅ اتوقع الخطه هتكون زياش ابراهام فيرنر 

ماونت ممكن اودوي نشوفه . بس الاولانيين دول هيلعبوا اساسي . متجبش ماونت بقا يلعب ورا اوي 

✅ ماتشات البلوز حلوه لو هتقولي رشحلي لاعب منها وسط او هجوم هقولك فيرنر اضمنهم وبعده هافريتز لو مكنش اصاب . 

زياش  ريسك لكن لو دخل ف الفورمه هيجبلك نقط لانه لسه حتى الان ديفرنشيال

✅ نسبه كلين لتشيلسي عاليه جدا لتشيلسى

✅ طير كل لعيبه شيفيلد صحيح نسيت اقولك . كلهم اوعي تسيب حد . شيفيلد . بيرنلي . بروميتش فولهام امسحهم من اللعبه 


7️⃣  بيرنلي & توتنهام

✅ كين لعب ٤٦ دقيقه بس ف الاوربي وطلع راحه مش اصابه وخيار كبتنه ممتاز

✅ سون لعب نص ساعه وهو كمان خيار كبتنه اكثر من متتاز

✅ بيل لعب ساعه نصبر شويه عليه لسه

✅ ريجيلون واورير كانوا خارج القايمه هنشوف مؤتمر توتنهام بكرا بس اظن دوهتري هيريح وواحد من دول هيبدا 

✅ بروميتش لو انهزمت ف كلام انهم هيشيلوا المدرب بنسبة كبيرة

✅ توتنهام سجلوا ١٨ . استقبلوا ٩ . طلعوا كلين

✅ ماتشاتهم الجايه بعد بروميتش . 

ستي .تشيلسي . ارسنال . البالاس . ماتشات تقيله اوووي

✅ الناس ال بتقولك نبدل كين ب فاردي . او فيرنر . ماتشاته صعبه والكلام دا . هات ال انت عايزه . لكن تقولي ابدل كين . 

كدا انت بتهزر . كين ميتبدلش باي لاعب مهما كان اسمه . كين احسن لاعب فانتازي الموسم دا ميتبعش . 

الاول ع العالم كبتن كين ٥ مرات من ٧ ودى معلومة كافية لينا ان كين يتحط بعد كده تحط ال 10 لاعيبه اللى باقيين .

✅ دبل كين وسون . اغلبنا عنده الاتنين دول . طيب بعد بروميتش هقولك رايي وانت حر

رايي استمر بكين وبدل سون براشفورد او برونو. دبل من توتنهام ال استفاد منه خلاص .

 ماتشاتهم هترخم وحرام لو توتنهام بلانك تخسر لاعبين . 

فرايي بدل سون براشفورد . بعد بروووميتش . تنوع اكتر اليونايتد جدول ممتاز وراشفورد فايق وهيروق عليك

✅ خيار كبتنه كين وسون وهتسالني مين هقولك انت واحساسك ٥٠ فالمية لكل لاعب يعنى مفيش افضليه لحد على التانى
 
✅ بيل ممكن يبدا الماتش دا اساسي اتوقع كدا

✅ بروميتش طير اى لاعب فيها من عندك وحتى دى بروين الغلابه بيريرا

✅ الكلين نسبته اكتر لتوتنهام وكعادتهم ممكن يفوزوا وكلينهم يضيع

كين . سون . بيل . اورير بس استني المؤتمر


8️⃣ ليستر & الولفز

✅ ليستر سجل ١١ استقبل ٩ طلع ٢ كلين 

✅ ماتشاتهم بعد دا . ليفربول . فولهام . شيفيلد . برايتون . ماتشات معقوله مش وحشه 

✅ الولفر سجل ٨ استقبل ٨ طلع ٤ كلين

✅ماتشاتهم  الجايه ساوث . ارسنال . ليفربول . فيلا

✅ عمالين تتخانقوا هيلعب نوري ولا سايس ولا كيلمان ولا مارسال . واصلا ماتشات الولفر الجايه مش حلوه وان طلعوا كلين 

هيكون ماتش من ال ٤ دول . فعشان كدا . بلاش تدفع ٥ و ٥ ونص ف مدافع ماتشاته السهله خلصت . 

هات كيلمان ب ٤.٢ تقدر تلعبه ماتش وتركنه الماتش الصعب ورخيص ولو ريح ماتش مش هتخسر 

✅ بديل سايس . لاعبين . زوما . بيرلين. افضل مليون مره من انك تقعد تقولي نوري ولا فلان ولا فلان 

✅ هو كيلمان بس ال برشحه وخمينيز طبعا ال بيسجل ف اي حد لكن نقطه من ٥ ل ٩ نقط

✅ مبدايا كدا فاردي ريح ماتش الاوروبي مشاركش اصلا يعنى هينزل فايق ورايق للولفز وهيسجل

✅ هارفي بارنس ريح ولعب اخر ربع ساعه

✅ جنكيز اندير لعب ساعه وطلع الواد دا لو اضمن انه اساسي هرشحه وبقوه

✅ ماديسون لعب ٩٠ دقيقه كامله

✅ ليستر هرشح منها فاردي . بارنس . جنكيز لو لعب اساسي 

انما ماديسون لو عندك طيره مش بيقدم اي حاجه واوقات بيفوزوا ٤ وتلاقي ماديسون مفيش اي مشاركه

✅ زي كل مره هقولكم هارفي بارنس لاعب تقيل اوووي وممكن تجيبه وتسيبه ومتتسرعش يوم مبيعمل ييجيب نقط حلوه

✅ كلين شيت ضعيف للفرقتين . عندك خيارات احسن قعدهم دكه . معندكش لعب مدافع ليستر الاول . لان اقرب سيكا للكلين



9️⃣ ويستهام & فولهام

✅ويستهام سجل ١٣ هدف واستقبل وطلع ٢ كلين . ماتشاتهم ال فاتت كانت زفت وكانوا قدام التوب وبرغم من كدا 

مقدمين مستوي ممتاز . هنبدا بقا ف السهوله وزي مقولتلكم الجوله ال فاتت حان الوقت اننا نرشح فريق ويستهام

✅ماتشاتهم الجايه شيفيلد . استون . يونايتيد . ليدز

✅ مبدايا كدا نفكر ف دفاعهم الفريق متماسك وهتاخد منه كلينات الفترات الجايه 

✅ #ماسواكو #كوفال #كريسويل 
؟؟؟

#كريسويل اغلاهم بس بيلعب كل حاجه ثابته يخطف اسيست كدا يعني . لكن سعره ٥.١ كتير . 

ف وجود زوما وبيرلين . فكتير تدفع سعر زي دا

#ماسواكو الواد دا سعره حلو وبيتقدم كتير وبرشحه الفتره الجايه . زي مقولت ماتشاتهم حلوه وسعره حلو ومش غالي

#كوفال كذلك الباك ب ٤.٥ وحلو هتاخد منه كلين اكتر من اسيست او هدف . 

فبيانسكي حارسهم الاساسي حارس متميز ومع الكلين بيعمل تصديات كتير ومتميز جدا في ضربات الجزاء حطه في حساباتك 

ممكن يروق عليك الفترة الجايه وبماتشاته السهلة اللي جاية من افضل خيارات الحراس اللي ب ٥ مليون

✅ بن رحمه بلاش تجيب سمك ف مايه . لاعب لسه مشوفنهوش فى قوه مباريات البريمرليج . 

اه عالي وكل حاجه لكن لو هتجيب منهم يبقي بوين

✅ فورنالس . الواد دا سعره حلو وبيخطف اجوان وكدا وماتشات ويستهام مشجعه .

 لكن هتسالني مين افضل هقولك ميال انا ل بوين اكتر 

✅ فولهام لما لعب الواد ريد دا اساسي مع لوكمان مع ميترو شكلهم اتحسن وشوفناهم الماتش الاخير قدام بروميتش . 

قدموا كوره حلوه . لكن دي بروميتش . طير لعبتهم افضل لان جوله هيجيبوا نقط و ٥ جولات لا

✅ الكلين ان كان حد اقرب هيكون ويستهام 


🔟 ارسنال & استون فيلا

✅ الفيلا سجل ١٥ واستقبل ٩ وطلع ٣ كلين . 

✅ ماتشاته الجايه برايتون ويستهام . نيوكاسل . ولفر

لسه ماتشات معقوله وتقدر تكمل بالاعتماد عليهم عادي جدا بعد ارسنال  

✅ ارسنال سجل ٩ واستقبل ٧ وطلع ٢ كلين بس عايز اكرر كلامى ارسنال بقى صلب وقوى دفاعياً والارقام لا تكذب فارسنال الان 

اقوى فريق فى الدورى دفاعياً رغم انه خلص السيتى و الليفر و المانيو و ليستر 
 
✅ ماتشات ارسنال الجايه بعد الفيلا . ليدز . ولفر . توتنهام . بيرنلي

ماتشات كويسه ما عدا توتنهام برضوا

✅ بنرشح من دفاعهم لينو وبيرلين 

 بيرلين اخر فتره اداء عظيم ومستوي هايل وهتشوف منه اسيستات كتير لانه بيتقدم اكتر من الباك الشمال تيرنى اللى بيضم كتير 

كمدافع ثالث وماسك جبهته ساكا فى التقدم 

✅ انا متوقع #اوبا هيكون من نجوم الجوله دي وهيرجع للتسجيل بهدف او هدفين ولو لسه عندك لاعبه وكبتنه 

✅جيراليتش ما زال خيار ححلو تقدر تسيبه عندك وماتشاته لسه حلوه


افضل خيارات الكبتنة بالترتيب :

1 - سون

2 - كين

3 - اوبامينج

4 - فيرينر

5 - لوين


شكراً لكم .. والى لقاء قريب ان شاء الله

📝 ميزو ارسنالى 


***********************


***********************

2 تعليقات

  1. افضل فقرة وانتظرها كل اسبوع لكن رجاء تنزلوها قبل الجولة بيوم على الاقل

    ردحذف
    الردود
    1. حاضر بأذن الله طلبك مجاب
      بس اعذرنا لما الاسبوع بيبدأ يوم الجمعه وبيكون فى مباريات دورى الابطال اخرها الاربعاء والخميس اليورياليج مش بيكون فى وقت بس بأذن الله فى قادم الاسابيع نملك وقت بعودة الانطلاقه ليوم السبت وننزل قبلها بيوم ان شاء الله ... شكرا لمرورك يا صديق

      حذف

إرسال تعليق

أحدث أقدم